فى البداية هتحس إنك مش قادر تخرَّجُه من جواك ،
وهتفكر ألف مرة ف إنك تدِّى فرصة تانية للمرة
المش عارف كام لحد ماهتوصل للنقطة الحرجة
اللى هتجبرك تمشى بدون ولا كلمة
التخلص من البنى آدمين اللى كانوا كل حاجة ف حياتك
بيبقى أمر أشبه بجراحة بدون تخدير
أعراض الإنسحاب بتبقى فعلا مميتة
الفراق ومطارده الذكريات لروحك المستهلكة
شعورك باﻹفتقاد والضعف
وإحساسك إنه واحشك رغم أذيِّتُه الشديدة ليك
موضوع تقيل وتفاصيل مميتة
وأوقات صعبة وبدون شك بتبقى فاتورة القرار
فوق طاقة التحمل
التخلِّى والإهمال والغياب أوقات الإحتياج
دى ذنوب كبيرة جدا لا تُغتفَر فى شرع العلاقات
الليالى الصعبة اللى عدت عليك وإنت لوحدك
فى أكتر وقت كنت محتاج فيه للدعم والونس
من ناس بعينهم بتخلقلك قلب أكتر قسوة
وعقل أكثر قدرة على إتخاذ القرارات
وعين تالته بتقدر تشوف بيها المشهد صح
وبتعلمك إن خسارة فى المنتصف
أفضل من
كارثة فى نهاية الطريق
وإن قرار خروجك من منطقة اللاشئ المميتة دى
هو أفضل قرار أخدته ف حياتك
خلى بالك | إدمان البني آدمين هو أسوء وأصعب
وأخطر أنواع الإدمان ،
لكن كونك تتألم وإنت بتخرجه من جواك
أفضل مية مرة من إنك تعيش طول عمرك تتألم بيه
